Mazda Motor компанияси Takata хавфсизлик ёстиқларида аниқланган нуқсон туфайли ўзининг тузатиб бериш учун ортга қайтариб олинадиган автомобиллари миқдорини маълум қилди. Бу ҳақда Рейтер агентлиги Япония автоконцерни маълумотига асосланиб, хабар берган.

Mazda томонидан маълум қилинишича, дунё бўйлаб жами 1,9 млн дона автомобиль ортга чақирилади. Қайтариладиган моделлар орасида Bongo Van минвэни, Titan юк машинаси (Mazda 6) ва Atenza седани бор. Бу моделлар 2004 йилдан 2006 йилгача бўлган муддат ичида ишлаб чиқарилган.

Носозлик ҳайдовчининг хавфсизлик ёстиқчаси насосида аниқланган. Уларнинг эҳтиёт қисмлари бошқасига алмаштирилади, аммо улар ҳозирда етишмаётганлиги туфайли созлаш ишлари ёзда бошланади. Қайтириб олинган барча автомобиль эгалари 60 кун ичида хабардор этилади.

Бунгача 14 компания (Honda, Volkswagen, General Motors, Toyota Motor Corp. ва Nissan Motor Co. шулар жумласидан) жами 25 миллионта автомобилни 2008 йилдан буён ишлаб чиқарилган Таката хавфсизлик ёстиқчаларидаги муаммо туфайли қайтариб олгани маълум бўлганди. Ушбу носозлик камида 10 та ўлимли вазиятга олиб келгани тахмин қилинади.