Хитойда қатл этилган Қирғизистон фуқароси Светлана Кулбаеванинг жасади ўз ватанига олиб келинди. Бу ҳақда Қирғизистон ташқи ишлар вазирлиги маълум қилди.

Вазирлик маълумотларига кўра, 200-юк Қирғизистонга 20 февралда самолётда олиб келинди. Аэропортда аёлнинг тобутини Қирғизистон ташқи ишлар вазирлиги вакиллари ва аёлнинг ўғли кутиб олди. Аёлнинг жасади қариндошларига дафн қилиш учун топширилди.

Светлана Кулбаева 2010 йил 5 октябрда Хитойнинг Урумчи аэропортида ҳибсга олинган. Аёлнинг қўл юки текширилганда 7 кг дан кўпроқ героин моддаси топилган. Кейинроқ аёл ўлим жазосига маҳкум қилинганди. Қирғизистонлик дипломатларнинг Хитой ҳукумати билан айбланувчининг Қирғизистонга топширилиши бўйича музокаралари ҳеч қандай натижа бермаган. Аёл 2016 йил 4 февралда қатл қилинди.