Каталониянинг «Барселона» клуби президенти Жозеп Бартомеу Англия премьер-лигаси борасида ўз фикрлари билан ўртоқлашди.

«Англия премьер-лигаси жамоалари ҳозирги вақтга келиб ақлбовар қилмас даражадаги молиявий имкониятларга эга. Бу эса бизни хавотирга солади. АПЛ – энг яхши футбол мусобақаси. Уларда мухлислар футболга кўпроқ қизиқиш билдиришади. Уларнинг даромадлари бошқаларникига нисбатан кўп. Барча жамоалар учун тенг шароитнинг яратилиши лигага ҳар бир кишининг қизиқишига сабаб бўлмоқда.

Бизда Испанияда жамоаларнинг бюджетлари ҳар хил кўринишда, шундай экан масалан Ла-лигадаги «Лестер»га ўхшаган жамоа юқори ўринлар учун кураша олмайди.

АПЛ – бизнинг рақобатчимиз, бу жиддий рақиб. Биз даромадларимизни кўпайтириш ва молиявий шароитимизни яхшилашимиз учун барча кучни ишга солишимиз керак. Шундагина бизнинг ёш иқтидорлар ўз клубларида қолишлари мумкин бўлади.

Мен айнан шу жиҳатдан хавотирдаман. Шунинг учун ҳам бу борада ишлар олиб бормоқдамиз. Биз ўз иқтидорларимизни сақлаб қолишни истаймиз.

Футболчиларимизнинг бошқа клублар билан алоқага чиқишганидан хабарим бор. Уларнинг бирортаси кетиш ҳақида гап очишгани йўқ. Кўпчилиги молиявий тарафдан ўта қулай бўлган таклифлар олишган, бироқ «Барселона»да тўп сураётган футболчилар пул учун эмас, футбол ва мухлислар учун шу ерда», – дейди Бартомеу.