Қўшма штатлар ва Исроил ҳаво ҳужумидан мудофаа бўйича қўшма машғулот ўтказишга киришади. Машғулотда ракета ҳужумидан ҳимояда қўлланиладиган, баллистик ракеталардан келадиган хавфни баратаф этишга мўлжалланган Juniper Cobra синовдан ўтказилади.

Пентагон вакили, АҚШ Қуролли кучлари капитани Жефф Дэвиснинг маълум қилишича, бу машғулот бундан кейин ҳар 2 йилда 1 марта ўтказилади ва 1 ҳафта давом этади.

"Бу Яқин Шарқда Исроил билан ўтказилувчи энг муҳим машғулотимиздир. Бундай машғулотлар илк марта 2001 йилда ўтказилган, бу сафаргиси саккизинчиси ҳисобланади. Америкаликлар томонидан машғулотларга ҳарбийлар ва мутахассислардан иборат 1700 киши жалб этилган", дейди у.

Дэвиснинг айтишича, машғулотларга АҚШ Қуролли кучларининг Европадаги қўмондонлиги вакиллари жалб этилади.

Пентагон расмийсининг айтишича, машғулотларда "Исроил тўқнашиши мумкин бўлган эҳтимолий хавфларнинг компьютер сценарийлари" бўйича олиб борилади. У "уруш ўйинлари" айнан қайси полигонда ўтказилишини маълум қилмаган. Бундан олдинги шу турдаги машғулотлар Негев саҳросида ўтказиб келинган.