Россия президенти Владимир Путин ва АҚШ президенти Барак Обама Сурияда ўт очишни тўхтатишни маъқуллашди. Бу ҳақда Путин " Россия 1" телеканали орқали кўрсатилган нутқида айтиб ўтди.

"Ҳозиргина АҚШ президенти Барак Обама билан телефон орқали суҳбат бўлди. Суҳбат ўтказиш Россия томонидан билдирилди, бироқ иккала томон ҳам бундан манфаатдор. Суҳбат давомида биз Суриядаги жанговар ҳаракатларни тўхтатиш бўйича Россия ва АҚШнинг қўшма баёнотини маъқулладик", деб айтди Путин.

Президент Сурияда ўт очишни тўхтатиш бўйича келишувни қон тўкилишини тўхтатиш учун реал қадам деб атади.

"Аминманки, АҚШ билан тинчликни таъминлаш бўйича биргаликдаги ҳаракатлар Суриядаги инқирозли вазиятни тубдан ўзгартиришга қодир. Ниҳоят кўп йиллик қон тўкишлар ва зўравонликдарга чек қўйиш учун реал имконият пайдо бўлди", деб таъкидлаб ўтди Путин.

Путиннинг айтишича, Россия келишувни амалга ошириш учун Дамашқ билан тегишлича иш ўтказади, АҚШ эса бундай ишни ўзи қўллаб-қувватлаётган гуруҳлар билан ўтказади.

Келишувга кўра, Сурияда жанг қилаётган барча томонлар ўт очишни тўхтатиш бўйича келишув 27 февраль яримтундан кучга кириши учун 26 февраль тушликкача ўзларининг унга амал қилишларини тасдиқлашлари керак.

Путиннинг таъкидлашича, келишув кучга киргандан кейин ҳам ИШИД ва Суриядаги бошқа террорчилик гуруҳларига зарбалар бериш давом эттирилаверади.