Дания пойтахти Копенгаген шаҳрида озиқ-овқат чиқиндилари сотиладиган илк супермаркет очилди. Бу ҳақда The Independent хабар берган.

Wefood номли бу супермаркет хўжайинлари бу орқали Данияда чиқиндига айланадиган ва исроф бўладиган маҳсулотларни камайтиришни мўлжаллашган. Айни вақтда бу супермаркетга кунига 700 минг тонна атрофида эскирган маҳсулотлар келтирилмоқда.

Хабар қилинишича, дўконда харидорлар бироз эскирган маҳсулотларни одатдаги дўконлардагидан 30-50 фоизгача арзонроққа олишлари мумкин.

Дания Атроф-муҳитни муҳофаза қилиш вазири Ева Кьер Хансен бу ташаббусни қўллаб-қувватлаган. Унинг фикрича, бундай дўконлар очиш озиқ-овқат маҳсулотларининг чиқитга чиқарилишига қарши курашда муҳим қадам бўлади.

"Бу ерга келтирилаётган озиқ-овқатлар шунчаки ташлаб юборилиши мумкин эди. Бу эса атроф-муҳитни ифлослантиради. Шунингдек, иқтисод учун зиён келтирарди", дейди у.

Бу супермаркет очилишида Дания маликаси Мари ҳам иштирок этган.

Нашрнинг қайд этиб ўтишича, Дания озиқ-овқат чиқиндилари муаммосига қарши жиддий кураш олиб бормоқда. Кейинги 5 йил давомида мамлакатда бундай чиқиндилар 25 фоизга қисқаришига эришилган.

Бундан олдинроқ, Францияда озиқ-овқатларни дўконлардан чиқитга ташлаш расман ман қилинганди.