Италия бош вазири Маттео Ренци Европа Иттифоқининг навбатдаги саммитига охирги Берлин кинофестивалида бош мукофотни қўлга киритган, италиялик режиссёр Жанфранко Розининг муҳожирлар муаммосига бағишланган "Денгиздаги аланга" (Fuocoammare) ҳужжатли фильми ёзилган 27 та DVD-дискни олиб бормоқчи ва уларни Европанинг қолган давлатлари етакчиларига улашмоқчи. Бу ҳақда Ренци ўзининг шахсий блогида айтиб ўтди.

"Мен эътиборга лойиқ итальян киноси тарафдориман. Бироқ мен танланган мавзуни ҳам қўллаб-қувватлайман. Бу фильм Лампедузанинг ҳотамтойлиги, оролга келаётган муҳожирларни авваламбор рақамлар эмас, инсонлар деб қабул қиладиган оролнинг эркаклари ва аёллари ҳақидадир. Мен кейинги Европа кенгашига 27 нафар европалик ҳамкасбимга ушбу фильм ёзилган 27 та диск олиб бораман. Умид қиламанки, улар бу фильмни кўришга вақт топадилар. Ва уни кўрганларидан кейин муҳожирлар муаммоси ҳақида бошқача муносабат билан гаплашишимиз мумкин бўлади", деб ёзди Ренци.

Ренци муҳожирлар муаммосини ҳал қилиш учун муросага боришни истамаётган баъзи давлатларни танқид қилади. Италия анчадан бери муҳожирларни қабул қилиш йўлида биринчи сарҳад ҳисобланади. Муҳожирлардан кўпи Сицилия бўғози орқали деярли "Европа учун эшик"ка айланган кичкина Лампедуза оролига етиб олиш учун ўз ҳаётларини хатарга қўйишади.

"Денгизда аланга" ҳужжатли фильми Лампедуза оролидаги муҳожирлар ҳақидаги фильм. Аввалроқ муҳожирлар муаммосига бағишланган, Эмануэле Криалезенинг "Қитъа" (Terraferma) бадиий фильми 2011 йилда Венеция кинофестивалида "Авлиё Марк кумуш шери" мукофотининг совриндори бўлган эди.