Ҳакамлар ҳайъати Johnson & Johnson компаниясини фирибгарликда ҳамда уларнинг маҳсулоти соғлиққа тузатиб бўлмас зиён етказиши мумкинлиги ҳақидаги маълумотни яширганликда айбдор деб топди.

"Миссури штати суди косметик маҳсулотлар ишлаб чиқарувчи йирик Johnson & Johnson компанияси зиммасига рак туфайли дунёдан кўз юмган аёл оиласига 72 миллион доллар миқдорида товон пули тўлаб бериш мажбуриятини юклади. Сент-Луис шаҳри ҳакамлар ҳайъати шундай қарорга келишди", деб хабар беради Reuters агентлиги.

Алабама штати Бирмингем шаҳрида яшаган Жаклин Фокс 2015 йилнинг октябрь ойида 62 ёшида тухумдон саратони туфайли оламдан ўтгач, унинг қариндошлари Johnson & Johnson га қарши даъво аризаси билан мурожаат этишган. Уларнинг фикрича, марҳума 35 йил давомида ушбу компания маҳсулотлари, жумладан жинсий гигиена ва болалар упасидан доимий равишда фойдаланиб келгани учун касаллик пайдо бўлган ва ривожланиб борган.

Johnson & Johnson суд қароридан норози эканликларини эълон қилдилар, аммо шикоят билан мурожаат қилишларини аниқ билдирмадилар.

Johnson & Johnson компаниясига қарши юзлаб аризалар келиб тушади. Жабр кўрганларнинг фикрича, компания ўз савдоси ҳақида қайғуриб, баъзи маҳсулотлари саратон чақириши мумкинлигини мижозларидан яшириб келган. Фокс оиласининг даъвоси Америкада илк бор Johnson & Johnson компаниясидан товон ундирилиши билан якунланди.

1886 йили асос солинган Johnson & Johnson дунёдаги энг йирик косметик, санитар-гигиеник ва тиббиёт ускуналарини ишлаб чиқарувчи компаниялардан биридир. АҚШнинг энг катта корхоналари рўйхатида 37-ўринни эгаллайди. 2014 йилда компаниянинг пул айланмаси 74 миллиард долларни ташкил этган.