Адабиётшунос Шуҳрат Ризаев Алишер Навоий номидаги киносаройида намойиш этилаётган Бекзод Жониевнинг “Мен ёлғончиман” номли комедияси ҳақида ўз мулоҳазасини билдирди. Бу фикрлар “Даракчи” нашрида чоп этилди.

Танқидчи бу фильмни томоша қилиб, “режиссёр алмойи-жалмойи лавҳалар йиғиндиси билан нима демоқчи, деган савол туғилгани” ҳақида гапирди.

“Воқеалар бир-бирига боғланмаган, сюжетда мантиқий яхлитлик йўқ. Бу режиссёринг устоз кўрмаган шогирд эканидан далолат. Кинонинг “алифбо”сидан то олий “математика”сигача ўқимаганлиги, ҳавас билан режиссёрликка қўл ургани сезилиб турибди”, дея режиссёрнинг фильм учун кеткизган вақти ва пулига ачинишини билдирди. Фильмга томошабин тушишига ишонмаслигини ҳам қўшимча қилди.

Танқидчи фикрларини давом эттирар экан, “Фильм ижодкорларида катта аудиторияга кинокартина тақдим қилиш даражасидаги на салоҳият, на билим бор”, дея аччиқ мулоҳаза қилди.