Швециянинг Doro компанияси ёши улуғ фойдаланувчилар учун қурилмалар ишлаб чиқаришга ихтисослашган.

MWC 2016 кўргазмасида компания ота-оналар, бувилар ва буваларнинг замонавий технологиялар билан муносабатини яқинлаштирувчи янги смартфонни тақдим этди.

Бу қурилма ўзининг жуда оддий интерфейси билан ажралиб туради: бошланғич экранда фақатгина “Қўнғироқ қилиш”, “Кўриб чиқиш” ва “Юбориш” буйруқлари ўрнатилган. 

Doro мутахассислари шуни тушунишадики, ёши катта инсон учун дастурларни чуқур ўрганиш қийин. Тақдим этилган қурилмада эса суратни жўнатиш учун “Юбориш” тугмасини босиш кифоя қилади. Қийин вазиятлардан қочиш учун, созлаш менюлари ҳам тушунарли ва содда равишда тузилган.

Смартфоннинг энг муҳим жиҳатларидан бири бу яқинлар билан мулоқотни осонлаштирувчи Connect & Care программаси ҳисобланади. Мисол учун, агар фойдаланувчига уй ишлари бўйича ёрдам керак бўлса, программа махсус хабар жўнатади. Яна бир муҳим жиҳатлардан бири, бу қурилманинг орқа панелида жойлашган тезкор “ёрдам тугмаси”.

Doro смартфони АҚШда шу йилнинг охирида сотувга чиқарилади. Қурилманинг нархи ҳақида маълумот йўқ, лекин Connect & Care программаси учун ойига 3 доллар тўлаш керак.