Ўзбек мумтоз қўшиқларининг моҳир ижрочиси, Ўзбекистон Республикаси халқ артисти Муножот Йўлчиева “Даракчи” газетасига берган интервьюсида болалик чоғларини хотирлади:

“...Устоз санъаткор Фаттоҳхон Мамадалиев тумандаги маданият уйида ансамбль ташкил қилиб бериш учун таклиф қилинган. Лекин ижрочилар кўп бўлгани боис, мени хонанда сифатида қабул қилишмаган. Раққосалар кам бўлгани учун “ритм”га мос рақс туша оладиган қизлар қатори мен ҳам рақс билан шуғулланганман...”

Хонанда суҳбат давомида маданият уйида рақс ўрганиб юргани, аммо қўшиқ куйлатишмагани учун маданият уйига бормай қўйгани ва мактабда математика фанига уқуви кам эканини ҳам эсга олди.

Шунингдек, хонанданинг маълум қилишича, отаси унинг қўшиқчи бўлишига қаттиқ қаршилик кўрсатган. Бироқ тоғасининг далдаси ва маслаҳати билан ундан розилик олишга эришган. Ҳатто консерваторияда Муножот Йўлчиевани “овозингиз опера хонандалигига тўғри келмайди”, деб вокал йўналишига ўқишга қабул қилишмаган.