Туркия алоҳида ҳолда Сурияга қуруқликдаги ҳарбий амалиётлар ўтказиш учун кирмоқчи эмас. Бу ҳақда мамлакат президентининг маслаҳатчиси Иброҳим Калинга асосланиб, Рейтер агентлиги хабар қилган.

Унинг таъкидлашича, Анқара халқаро коалиция билан ҳамкорлик қилишда давом этади.

"Биз бундан олдин ҳам бир неча марта айтганмиз, жангариларга қарши курашда халқаро коалиция билан ҳамкорлик қилишда давом этамиз. Шунинг учун, Саудия Арабистони билан бирга ёки бошқа давлат билан бошқа иттифоқ тузиб, Сурияда қуруқликдаги ҳарбий амалиётларни бошлаш ниятида эмасмиз. Буни муҳокама қилишнинг ҳам ҳожати йўқ", дейди у.

Бундан олдинроқ, Туркия ТИВ раҳбари Мавлют Човушўғли Сурияда қуруқликдаги ҳарбий амалиётлар бошлаш кун мавзуси эмаслигини айтиб ўтганди. У Туркия Сурияга қуруқликдаги қўшинларини фақатгина халқаро коалиция таркибида киритиши мумкинлигини қўшимча қилган.