АҚШ олимларининг кейинги тадқиқотлари шуни кўрсатдики, стрессга бўлган ҳиссий реакция кетма-кет содир бўлган стрессларга нисбатан соғлиққа зарар келтиради. Тадқиқот натижалари Psychosomatic Medicin журналида чоп этилган.

Маълумки, стресс ва салбий ҳиссиётлар юрак ва қон-томир касалликларини келтириб чиқаради, лекин ҳозиргача бунинг сабаби аниқ эмас. Тахминлардан бири бу стресс ҳолатининг вегетатив асаб тизимига зарар етказиши, стресс ҳолатларининг такрорланиши ва юрак ритмининг ўзгариши ўртасида қандай муносбат бор экан деб қизиқиб кўришди.

«Соғлом бўлиш учун юрак ритмининг ўзгарувчанлиги муҳим. Ўзгарувчанлик кам одамлар юрак касалликларига чалинишга кўпроқ мойил бўлиб, вақтидан олдин ўлиш хавфи мавжуд», деб ҳисоблайди Пенсильвания соғлом улғайиш маркази доктори Ненси Син.

Олимлар саккиз кун ичида 35дан 85 ёшгача бўлган 909 қатнашувчини текшириб, улардан келган маълумотларни солиштиришди. Бу текширувда қатнашувчилар ўз стресс ҳолатлари ҳақида телефонда интервью орқали гапириб беришди. Кейин эса, интервьюдан олинган маълумотлар электрокардиограмма билан солиштирилди.

Шу маълум бўлдики, стрессга бўлган ҳиссий реакция стресснинг ўзига нисбатан кўпроқ зарар кўрсатар экан. Юрак уриш ритмининг ўзгарувчанлиги камайиб кетиши, салбий ҳиссиётларни ҳис қилган одамда кўпроқ кузатилган.

Олимлар умид қилишадики, бу тадқиқот натижалари шундай ҳолатларни тузатишда ёрдам берувчи амалиётларни ишлаб чиқишда ёрдам беради.