Ryanair авиакомпаниясининг Лондон-Братислава рейси бўйича учаётган самолёт Берлиннинг Шенефельд аэропортида режадан ташқари қўнишни амалга оширди. Германия федерал полициясида маълум қилинишича, самолёт сардори самолётдан бир гуруҳ маст ҳолдаги йўловчиларни тушириб қолдиришга қарор қилган.

Ушбу воқеа 26 февраль кечки пайт юз берган. 25 ёшдан 28 ёшгача бўлган 12 нафар Британиянинг Саутгемптон шаҳридан бўлган йигитлар Братиславада "куёв оши" ўтказмоқчи бўлишган. Бироқ Словакия пойтахтига улардан бор-йўғи 6 нафари йўлини давом эттирди. Қолганлар, жумладан бўлғуси куёв ҳам бирозга Берлинда қолишига тўғри келган.

Полиция вакилининг маълумотларига кўра, парвоз пайтида қоидабузарлар хавфсизлик қоидаларини бузганлар, бортперсонал кўрсатмаларига бўйсунмаганлар. Йигитларга спиртли ичимликлар сотиш рад этилганда, улар ўзларини тажовузкорона тутишни бошлаганлар ва самолёт сардори самолётни қўндириб, уларни тушириб юборишга қарор қилган. Энди куёвтўра ва унинг дўстларига ҳаво транспортида хавфсизлик қоидасини бузганлик учун 25 минг евро жарима солиниши мумкин.

Самолёт бортида 170 нафар йўловчи бўлган.