Ўзига хос фильмлари билан шуҳрат қозонган режиссёр Жаҳонгир Аҳмедовнинг узоқ вақт давомида суратга олинган ўзига хос яна бир ижод маҳсули, охирги ҳафтларда ОАВ ҳамда мухлислар диққат марказида бўлган "Мажнун" кинокартинасининг премьераси ўтказиладиган кун маълум бўлди. Режиссёрнинг ижтимоий тармоқлардаги саҳифаларида маълум қилишича, фильм 6 март куни Тошкент шаҳридаги Алишер Навоий номли киносаройда илк бор намойиш қилинади. Фильмни 7 март кунидан бошлаб пойтахт кинотеатрларида томоша қилиш мумкин.

Шунингдек, “Мажнун” нафақат ўзбек, балки рус ва қозоқ тилларида ҳам катта экранларга чиқарилиши режалаштирилган. Ижодкорлар фильмни нафақат ўзбек кино бозорида, балки Қозоғистон ва МДҲ мамлакатларида ҳам намойиш этишади.

Фильмдаги асосий ролларда ўзбек киносининг бугунги кундаги энг машҳур қиёфаларни учратиш мумкин: Улуғбек Қодиров, Асал Шодиева, Матёқуб Матчонов, Муҳаммадисо Абдулхайров, Элёр Маҳкамов ва ҳоказо.

Бу фильмни январь ойида киномухлислар эътиборига ҳавола этилган ва катта қизиқиш билан кўрилган "Барон" фильмининг темпини давом эттирадиган яна бир фильм сифатида кутишмоқда.

Фильмга катта маблағ сарфланган, актёрлар учун катта гонарарлар тўланган. Қолаверса, унда энг сўнгги замонавий кинотехнологиялардан фойдаланилган. Турли мураккаб эффектлар ва тасвирий ечимлар асарга янада таъсирчанлик бағишлаши кутилмоқда.