Россия ташқи ишлар вазирлигида Суриядаги ярашув тартибининг барбодга учраши вазиятида президент Башар Асадни ҳокимиятдан четлатувчи "Б режа"нинг мавжудлиги БМТ Хавфсизлик кенгаши қарорига зид келади, деб айтилди. Бу ҳақда "Интерфакс" ахборот агентлиги маълум қилди.

"Бу гаплар бир овоздан қабул қилинган БМТ Хавфсизлик кенгаши қарорларига мутлақ зид келади ва бу резолюциялар Саудия Арабистони, АҚШ, Туркия ва Россия иштирок этган Вена формати доирасидаги ҳамфикрликка мувофиқ қабул қилинган", деб айтди Россия ташқи ишлар вазири ўринбосари Михаил Богданов Саудия Арабистони ташқи ишлар вазири Одил ал-Жубайр айтган гапларга жавобан.

"Биз барча босчиқларда "Б режа" йўқ деб айтдик. Биз келишганларимизни биргаликда бажаришимиз керак", дуб қўшимча қилди Богданов.

Аввалроқ Саудия Арабистони ташқи ишлар вазири Одил ал-Жубайр агар Сурия ва унинг иттифоқчилари ярашувга амал қилмасалар, унда Суриядаги ҳокимият Башар Асаддан бошқа қўлларга топшириладиган "Б режа" ишга туширилишини айтганди.