ITE Uzbekistan компанияси Тошкентдаги "Ўзэкспомарказ" миллий кўргазма мажмуасидаги 2016 йилги баҳорги мавсумни бирданига учта кўргазма билан бошлайди. Бу ерда UzBuild 17-қурилиш кўргазмаси, Aqua-Therm Tashkent иқлим ва сув таъминоти қурилмалари 5-кўргазмаси ва MebelExpo Uzbekistan мебель ва ёғочга ишлов бериш 13-кўргазмаси бўлиб ўтади.

300 та компания 2-4 март кунлари бўлиб ўтадиган кўргазмаларда иштирок этишини тасдиқлади. ITE Uzbekistan биринчи марта бу кўргазмаларни алоҳида павильонларда ўтказади.

UzBuild-2016 кўргазмаси 19 та давлатдан 140 та компания стендларини бирлаштиради. Бундан ташқари, Германия, Италия ва БАА, шунингдек, Россиянинг Киров вилоятидаги компанияларнинг жамоавий гуруҳи миллий стендларни намойиш қиладилар.

Аввалги йилдаги кўргазмага 13-14 минг одам ташриф буюрганди, ташкилотчилар бу йилги кўргазма янада каттароқ қизиқиш уйғотишига умид қилмоқдалар.

Aqua-Therm Tashkent кўргазмасида 12 та давлатдан 55 та иштирокчи қатнашади.
MebelExpo Uzbekistan кўргазмасида эса 15 та давлатдан 90 дан кўпроқ компания, жумладан Ўзбекистондан 25 та компания иштирок этади.

Шунингдек, баҳорда ва ёзнинг илк кунлари яна бир қатор кўргазмалар бўлиб ўтади:
"Озиқ-овқат саноати — WorldFood Uzbekistan" 16-кўргазмаси ва "Қишлоқ хўжалиги — AgroWorld Uzbekistan" 11-кўргазмаси (16-18 март), «Соғлиқни сақлаш — TIHE» (19-21 апреля) 21-кўргазмаси, "Энергетика, энергияни тежаш, муқобил технологиялар, электротехник қурилмалар, ахборот-ўлчаш техникаси — Power Uzbekistan» 11-кўргазмаси ва «Ўзбекистон нефть ва гази — OGU» (18-20 май) 20-кўргазмаси ҳамда "Ўзбекистон инфратузилмаси / Фарғона водийси — Uzbekistan Infrastructure / Ferghana Valley» 2-кўргазмаси (1-3 июнь).