АҚШ бошчилигидаги халқаро аксилтеррорчилик коалицияси мудофаа вазирлари икки ҳафта олдин Брюсселда Сурияда қуруқликдаги операцияни ўтказиш имконини муҳокама қилдилар, деб хабар бермоқда Reuters ахборот агентлиги.

Бу ҳақда Саудия Арабистони мудофаа вазири ёрдамчиси, бригада генерали Аҳмад Асирий маълум қилди.

Асирийнинг айтишича, муҳокама ҳарбий даражада эмас, балки сиёсий даражада ўтказилган. Генерал, шунингдек, муҳокама якунларига кўра ҳеч қандай қарор қабул қилинмагани қўшимча қилди.

"Қуруқликдаги операция ташкиллаштирилиб ва унда қанча қўшин иштирок этиши, улар қаерга юборилиши ҳал қилингандан кейин биз унда иштирок этамиз", деб айтди Асирий ва буни ҳарбий мутахассислар билан муҳокама қилиш зарурлигини қўшимча қилди.