Фарғонада ўтказилган ахборот технологиялари ва коммуникация соҳаси мутахассисларини иш билан таъминлаш мақсадида ташкил этилган ярмаркада 33 корхона, ташкилот ва муассаса ўзларида мавжуд бўш иш ўринлари билан қатнашди. Университет ҳамда касб-ҳунар коллежларининг 300 дан ортиқ битирувчисига ишга жойлашиш учун йўлланма берилди. 60 га яқин ёш мутахассис билан шу ернинг ўзида меҳнат шартномаси имзоланди.

Ана шундай “Таълим ва мутахассислик” кўргазмаси ва бўш иш ўринлари ярмаркаси Тошкент ахборот технологиялари университети Қарши филиалида ҳам ўтказилди. Унда ахборот-коммуникация технологиялари йўналиши бўйича университет ва касб-ҳунар коллежларида таҳсил олаётган ёшлар соҳага дахлдор корхона ва ташкилотлар тақдим этган бўш иш ўринлари билан танишди.

–Мамлакатимизда ёшлар бандлигини таъминлашга алоҳида эътибор қаратилмоқда, – дейди Тошкент ахборот технологиялари университети Қарши филиалининг маънавият ва маърифат бўлими бошлиғи Ҳикмат Сафаров. – Ўтган ўқув йилида 220 дан ортиқ битирувчининг 97 фоизи ахборот-коммуникация технологиялари соҳасида фаолият юритаётган корхона ва ташкилотларга ишга жойлашди. Бугунги ярмарка ҳам иш берувчи ва ёш мутахассислар ўртасида самарали ҳамкорликни мустаҳкамлашга хизмат қилади, деб ёзади Ўзбекистон миллий ахборот агентлиги.