Хитой божхоначилари чегарадан 9 мингта хотира картасини баданига ўраб олган ҳолда олиб ўтмоқчи бўлган эркакни қўлга олди. Бу ҳақда South China Morning Post нашри маълум қилди.  

Ҳисоботга кўра, эркак озиқ-овқат плёнкаси ёрдамида ўзининг баданига 100 минг юанлик (15 минг долларлик) хотира карталарини ўраб олган. У Гонконгдан Шэньчжэнга келишда қўлга олинган. У қўлга олинганда божхона ходимларига 50 минг юань миқдорида пора таклиф қилган.

Шунингдек, бу воқеадан бир соат олдинроқ ҳам Шэньчжэнь божхоначилари худди шу йўл билан 10 мингта хотира картасини олиб ўтмоқчи бўлган кекса аёлни қўлга туширишган. Нашрнинг таъкидлашича, божхоначилар мунтазам равишда чегарадан электрон қурилмалар олиб ўтмоқчи бўлган одамларни қўлга туширадилар, чунки бундай қурилмаларнинг аксарияти Гонконгда арзонроқ туради.