АҚШ конгрессмени Седрик Ричмонд сан-бернардинолик террорчининг iPhone’идаги маълумотларни ўқиш борасидаги тинглашларда россиялик хакерлар смартфонларга масофадан туриб кира олишлари хавфи борлиги ҳақида маълум қилди. 

Ричмонднинг айтишича, унинг Украинага ташрифи вақтида хавфсизлик бўйича маслаҳатчилар россиялик хакерлар масофадан туриб смартфонни оча олишлари ва ундаги маълумотларни қўлга кирита олишларидан хавотирланиб, унга телефонини ўчириб қўйиш ва уни самолётда қолдиришни тавсия қилишган.

Ричмонд хавфсизлик бўйича мутахассислар россиялик хакерлардан хавфсираётган бир вақтда Федерал қидирувлар бюроси ходимлари ўз ихтиёрларида бўлган телефонга кира олмаётганларидан таажжубланди. 

Февраль ўрталарида Apple компанияси суднинг сан-бернардинолик террорчининг iPhone’ини очиб бериш ҳақидаги кўрсатмасини бажаришдан бош тортди. Федерал қидирувлар бюроси компаниядан террорчининг смартфонига маълумотларни ҳимоя қилишнинг муҳим функцияларини ўз ичига олмайдиган янги операцион тизим версиясини яратиб, уни телефонга ўрнатишни талаб қилган. Apple раҳбари Тим Кук бундай дастур ёрдамида кейин исталган iPhone’ни очиш мумкинлигини таъкидлаб, бунга қарши чиққан.