Ўзбекистон Қишлоқ ва сув хўжалиги вазирлигидан маълум қилишларича, жорий йилда 8 минг 200 гектардан кўпроқ майдонда янги боғ, 5 минг 800 гектарда узумзор яратилади. Туман ва шаҳарлар маркази, аҳоли турар жойлари, йўл бўйлари ва хиёбонларга минглаб кўчат ва қаламчалар, гуллар ва буталар экилади.

Жумладан, академик М.Мирзаев номидаги боғдорчилик, узумчилик ва виночилик илмий-тадқиқот институти баҳорда жойларга етказиб бериш учун 4 миллион донадан кўпроқ манзарали ва мевали дарахт, ток ҳамда гул кўчатларини тайёрлади.

Жорий йилдан институт ва унинг филиалларидан харид қилинган ҳар бир кўчат учун нав гувоҳномаси ҳам тақдим этилмоқда. Бу ниҳолга ўзига хос кафолатдир. Бозордан кўчат олган киши тажрибали деҳқон бўлмаса, алданиб қолиши мумкин. Масалан, шафтоли ва ўрик кўчатлари бир-бирига ўхшагани боис ҳамма ҳам уларни дарров ажратолмайди, деб ёзади Ўзбекистон миллий ахборот агентлиги.