Италиянинг «Наполи» клуби ҳужумчиси Гонсало Игуаин фаолиятини Англиянинг «Манчестер Юнайтед» жамоасида давом эттириши мумкин. Бу ҳақда Corriere dello Sport нашри хабар тарқатди.

Манбанинг хабар беришича, инглиз клубига Жозе Моуриньо бош мураббий этиб тайинланган тақдирда 28 ёшли ҳужумчи ҳужумни кучайтириш учун асосий номзод бўлади.

«Манчестер Юнайтед» аргентиналик футболчи учун 80 миллион евро тўлашга тайёр бўлиб турибди.

Игуаиннинг «Наполи» билан амалдаги шартномаси 2018 йилнинг ёзига қадар давом этади. Шартномада кўрсатиб ўтилган товон пули 94,5 миллион евро қилиб белгиланган. Қайд қилинишича, томонлар битимни узайтириш бўйича музокараларни тўхтатиб қўйишган.

Эслатиб ўтамиз, футболчига шунингдек «ПСЖ» ва «Челси» жамоалари ҳам қизиқиш билдирмоқда.

Жорий мавсумда Игуаин Италия чемпионатида 27 учрашувда майдонга чиқиб, 25 бор рақиблар дарвозасини ишғол қилишга муваффақ бўлган.