Туркия ўз ҳудудий сувларига (акватория - сув ҳавзасининг чекли бир қисми) НАТО кемаси кириб келишига йўл қўймади. Бу ҳақда RTBF хабар берган.

Ҳукумат бу қарорини НАТО денгиз кучлари гуруҳи қўмондони Йоргу Кляйну аввалига ўз ҳаракатларини белгилаб олиш учун Анқарага келиши кераклиги билан изоҳлаган. 

Қайд этилишича, кема ноқонуний миграция йўналишларида амалиёт ўтказиш мақсадида сузаётганди.

Берлин ва Анқара ушбу масала бўйича музокаралар ўтказмоқда. Туркия ҳукумати НАТО кемалари томонидан Эгей денгизида "қутқарилган қочқинлар"ни ўз ҳудудида қабул қилишга қарши экани айтилади.

Туркия денгиз чегараларига НАТО ҳарбий кемаларини юбориш ҳақидаги қарор 11 февраль куни Брюсселда бўлиб ўтган учрашувда қабул қилинганди.

Бундан олдинроқ, НАТОнинг назорат гуруҳи таркибидаги 2 кема Грузиядаги Батуми портига келгани ҳақида хабар берилганди. Айни вақтда Батумида Туркия, Испания ва Руминия кемалари ҳам бор.