Пхеньяннинг ядровий-ракета дастурини ривожлантиришига қарши киритилган санкциялари доирасида Хитой Шимолий Кореядан кўмир ва кон саноатининг бошқа маҳсулотлари импортига қисман чекловни амалга киритди.

Япон тадбиркорлар газетаси "Никкэй"нинг ёзишича, Хитой Халқ Республикасининг баъзи портлари ва божхона постлари шундай маҳсулотларни киритмаслик ҳақида буйруқ ҳам олишган, деб хабар беради ТАСС.

Хусусан, бундай буйруқ икки томоннинг муҳим савдо маркази ҳисобланган Даньдун шаҳри чегараси раҳбарларига етказилган. 1 март куни Шимолий Кореядан 70 та юк машинаси кирган ва улардан бирортасида ҳам кўмир ҳам, руда ҳам бўлмаган. 29 февраль куни эса юк машиналарнинг сони икки баробар кўп бўлган, уларнинг аксарияти тоғ-кон маҳсулотларини олиб ўтганлар.

Шимолий Корея ташқи савдосининг 90 фоизи Хитой билан боғлиқ, унинг экспортида кўмир савдоси 40 фоизни эгаллайди. Айнан кўмир сотиш орқали Пхеньян ҳар йили 1 миллиард доллардан ортиқ фойда оларди. Бундай катта даромаднинг кескин камайиши, мутахассисларнинг таҳминига кўра, Шимолий Кореянинг ядер қуроли ва баллистик ракета яратиш борасидаги уринишларини сусайтиради ёки бутунлай тўхтатади.
Бироқ, Токионинг фикрича, Хитой оддий аҳоли турмуш тарзига зиён келтирмаслик учун бундай чекловни тўлиқ амалга киритишга рози бўлмаслиги мумкин.