ИШИД ҳар ой Яқин Шарқдаги валюта бозорларида 20 млн долларга яқин даромад олади. Бу террорчилик гуруҳи учун нефть контрабандаси ва товламачилик билан бир қатордаги даромад манбаи ҳисобланади. Бу ҳақда The Telegraph нашри Буюк Британия парламентининг хорижий ишлар бўйича комиссияси йиғилишида маълум қилинган маълумотларга иқтибос келтирган ҳолда хабар бермоқда.    

Британия парламентининг террорчиликни молиялаштиришга қарши курашиш қўмитаси бошлиғи Жон Бэйроннинг айтишича, террорчилик гуруҳи валюта бозорларида ўйнаш учун пулларни 2014 йил июнида Мосулни босиб олганда у ердаги Ироқ марказий банкининг филиалида сақланган 429 млн долларни қўлга киритган. Бэйроннинг айтишича, валюта бозоридаги савдоларга Ироқ ҳукумати террорчилар назоратида бўлган ҳудудлар аҳолисига ўтказадиган пенсия тўловлари ҳам ишлатилади.

Валюта савдоларидан олинган даромад ИШИД назоратида бўлган ҳудудларга мусулмон давлатларида кенг тарқалган "ҳавола" деб номланувчи пул ўтказмаларининг норасмий тизими орқали жўнатилади.

Газетанинг таъкидлашича,  ИШИД шунингдек нефть контрабандаси ва товламачиликдан ҳам катта даромад олади. БМТ маълумотларига кўра, ИШИД нефть савдосидан 2015 йилда 400-500 млн доллар топган. Пентагоннинг баҳолашича, террорчиларнинг даромадлари халқаро коалициянинг нефть инфратузилмасига берган зарбалари оқибатида 3 марта камайган.