Ўзбекистон олий ва ўрта-махсус таълим вазирлигида 29 февраль куни Корея фан ва технологиялар институти (KAIST – Korea Advanced Institute of Science and Technology) делегацияси билан бўлиб ўтган учрашувда KAIST бизнес-мактабининг Ўзбекистондаги филиалини ташкил этиш масаласи муҳокама қилинди.

Делегация раҳбари муайян келишувга эришилган тақдирда Тошкент шаҳрида KAIST филиали очилишини маълум қилди.

Вазирлик ахборот хизматининг хабарига кўра, дастлабки босқичда молия факультетига 200 нафар талабани қабул қилинади.
Шунингдек, филиалда иқтисодиёт факультети очилиши ҳам режалаштирилмоқда.

Делегация аъзолари Ўзбекистонда бу каби ўқув муассасаларини очиш шарт-шароитлари ва Ўзбекистон фуқаролари учун мақбул бўлган тўлов миқдори, квотани тўлдириш масалалари билан қизиқдилар.

KAIST муҳандислик ва техник тайёргарликка иҳтисослашган институт бўлишига қарамай, унда молия ва банк иши, хусусан, хусусий секторни молиялаштириш, корпоротив молиялаштириш, молиявий маркетинг ва бошқа соҳалар бўйича ҳам мутахассислар тайёрланади.

Университетнинг Жанубий Корея пойтахти ва бошқа шаҳарларидаги бўлимларида беш мингга яқин талаба таҳсил олади.

KAIST Олий бошқарув мактаби, молия ва бухгалтерлик ҳисоби олий мактаби, Информацион технологиялар ва ОАВни бошқариш Олий мактаби, Табиатни муҳофаза қилиш олий мактаби йўналишларида талабаларга таълим беради.