Ўзбекистон Республикаси Президентининг 2016 йил 2 мартдаги тегишли қарорига асосан Рустамов Одилхон Боқиевич «Ўзбекозиқовқатхолдинг» компанияси раиси этиб тайинланган. Шу муносабати билан у Давлат солиқ қўмитаси раиси ўринбосари лавозимидан озод этилган. Бу ҳақда Ўзбекистон Республикаси Солиқ қўмитаси сайти хабар берган.

О.Рустамов давлат солиқ хизмати тизимида 1993 йилдан бери турли лавозимларда, 2001-2005 йилларда Тошкент шаҳар Чилонзор, Учтепа туманлари давлат солиқ инспекцияси бошлиғи, 2005-2009 йилларда Тошкент шаҳар давлат солиқ бошқармаси бошлиғи ўринбосари, Хоразм ва Жиззах вилояти давлат солиқ бошқармалари бошлиғи лавозимларида ишлаган.

У Давлат солиқ қўмитаси раиси ўринбосари лавозимига эса 2009 йилнинг март ойида тайинланган эди.

Рустамов Одилхон Боқиевичнинг давлат солиқ хизмати органларидаги самарали фаолияти давлатимиз томонидан юқори баҳоланиб, Ўзбекистон Республикаси Президентининг 2015 йил 27 августдаги фармонига мувофиқ давлатимизнинг юксак мукофоти «Меҳнат шуҳрати» ордени билан тақдирланган.

Бундан олдинроқ, Ўзбекистон президентининг 18 февралдаги қарори билан Озиқ-овқат саноати корхоналари ассоциацияси тугатилиб, «Ўзбекозиқовқатхолдинг» холдинг компанияси ташкил қилиниши ҳақида хабар берилганди.