8 март куни диаметри 30 метрни ташкил қиладиган, 2013 TX68 номини олган астероид Ер сайёраси яқинидан учиб ўтади. Бу ҳақда Popmech.ru хабар берган.

Ҳажми катталигига қарамасдан ушбу осмон жисми Ердаги ҳаёт учун хавф туғдирмаслиги таъкидланмоқда.

Бу астероид 2013 йилнинг кузида аниқланган, бу осмон жисми диаметри ўша йилда (2013 йилнинг 15 февралида) Россиянинг Челябинск шаҳри ҳудудига тушган метеорит диаметридан 10 метрга каттароқ.

У Ерга яқинлашиб, бор-йўғи 17 минг километр узоқликдан парвоз қилиши ҳақида айтилган. Ҳозирда диаметри 30 метр бўлган мазкур самовий объект 14 миллион километр узоқликда.

NASA маълумотларига кўра эса объект 8 март куни Ердан 5 миллион километр узоқликда учиб ўтиши айтилган. Объектни телескоплар орқали кузатиш мумкин бўлади.

2013 TX68 астеродининг Ерга кейинги яқинлашуви 2017 йилнинг 17 сентябрида содир бўлади. Ҳисоб-китобларга кўра, икки йилдан кейинги парвознинг Ерга хавф солиш эҳтимоли 250 миллиондан бир улушга тенг бўлади. Унинг портлаши туфайли Челябинскда ёнган астероиддан кўра (унинг диаметри 20 метр бўлган) икки баробар кўпроқ энергия ҳосил бўлиши мумкин.

Эслатиб ўтамиз, Ер яқинидан 2 мартга ўтар кечаси йирик ҳажмдаги астероид учиб ўтган эди.