Франция ҳукумати террорчилик билан боғлиқ жиноятларни тергов қилиш доирасида тегишли идоралар билан ҳамкорлик қилишдан бош тортадиган смартфон ишлаб чиқарувчиларини жазолаш меъёрини киритмоқчи. Жиноий ислоҳотлар ҳақидаги қонун лойиҳасига тегишли тузатишни киритиш Франция парламенти қуйи палатаси депутатлари томонидан қабул қилинди.

Қонун ҳужжатида таъкидланишича, "террорчилик билан боғлиқ жиноят ва қоидабузарликларни тергов қилаётган ваколатли суд идораларига криптография ёрдамида ҳимояланган маълумотларни беришдан бош тортаётган хусусий муассасалар" жазоланиши кўзда тутилади.

Таъкидланишича, санкциялар остига у ёки бу шифрлайдиган механизм яратиб ва шу тариқа керакли қурилмани очиш учун тегишли идораларга имконият бериши мумкин бўлган компаниялар ҳам тушади. Бу модда бўйича жазо тариқасида 5 йилга озодликдан маҳрум этиш ва 350 минг еврогача жарима тўлаш кўзда тутилади.

Шунингдек, тергов билан ҳамкорлик қилишдан бош тортган уяли алоқа операторлари ҳам қаттиқ жазоланади. Эндиликда фойдаланувчилар ҳақидаги маълумотни ошкор этишдан бош тортиш телефон компаниялари вакилларига 15 минг еврогача жаримага тушиши мумкин ёки 2 йилга озодликдан маҳрум этиш билан хавф солади.

Бу қонун лойиҳасини мухолиф "Республикачилар" партияси депутатлари киритди. "Бу одил судлов билан ҳамкорлик қилишдан бош тортадиган шифрлаш кодларини яратувчиларга нисбатан жиноий жавобгарликни аниқ белгилашга имкон беради", деб айтди партия вакили Филипп Гужон.

Франция адлия вазири Жан-Жак Урвоа бундай қоиданинг жиноят қонунчилигига киритилиши мақсадга мувофиқлигини тан олди, бироқ унинг амал қилиши фақатгина террорчилик ишлари билан чегаралангани жиноят кодексида муайян номутаносиблик келтириб чиқаришидан огоҳлантирди. У мавжуд камчиликлар кейинги парламент дебатларида бартараф қилиниши мумкинлигини таъкидлаб ўтди.