Қирғизистонда рули ўнг томонда жойлашган автомобиллардан тижорат мақсадларида 2020 йилгача фойдаланишга рухсат берилди.

Қирғизистон парламенти рули ўнг томонда жойлашган автомобиллардан тижорат мақсадларида фойдаланиш учун жарима киритишни ортга суриш ҳақида қонун лойиҳасини қабул қилди. Бу қарор парламентнинг 3 мартдаги йиғилишида овоз бериш орқали қабул қилинди, деб хабар бермоқда КирТАГ агентлиги.

Парламент томонидан маъқулланган "Автомобиль транспорти ҳақида"ги қонун лойиҳаси президентга имзолаш учун юборилди.

Ҳужжатга кўра, 2020 йилнинг 1 январигача рули ўнг томонда жойлашган автомобиллар эгалари аҳоли пунктлари ичида ва Қирғизистоннинг шаҳарларо магистралларида йўловчи ва юк ташиш билан шуғулланишлари мумкин. Бу сана тугагандан кейин бундай машиналардан фойдаланиш учун жарима ундириш қоидаси кучга киради.