Қуролланган тўрт кишидан иборат жиноий гуруҳ Аргентинадаги унча катта бўлмаган бутун бир шаҳарни ўмариб кетди, деб хабар бермоқда El Heraldo.

Нашр берган ахборотга кўра, жиноятчилар шаҳарнинг мэрияси, банки, почтаси, суди ва ҳатто полиция маҳкамасида ўғирлик содир этган. Воқеа мамлакатнинг Санта-Фе провинциясидаги Бернардо-де-Иригоен шаҳрида содир бўлган. Шуни алоҳида келтириб ўтиш лозимки, шаҳарда бор йўғи 1,8 минг киши истиқомат қилади.

Бошида қароқчилар полиция маҳкамасига кириб, у ерда “қуролланишади”. Сўнгра пул сақланадиган бошқа ерларга бирма бир “ташриф буюришади”. Улар судга келиб, судьяни ҳам ўмаришади. Жиноятчилар қўлга киритган умумий сумма 250 минг песони (тахминан 16 минг доллар) ташкил этади.

Улар 1 млн песо (65 минг доллар) қийматида пенсия пуллари ортилган машинани ҳам кутишади, аммо айнан ўша дамда машина келмайди.
Воқеа сўнгида жиноятчилар ва полиция ўртасида “қувлашмачоқ” бошланади. Улардан бири отиб ўлдирилган, қолган уч жиноятчи эса пуллар билан яширинишга муваффақ бўлган.