Вьетнамда икки турли эркакдан эгизак фарзанд кўриш ҳолати қайд этилди, деб хабар бермоқда Tuoi Tre News портали. Бундай ҳодиса жуда кам учрайди.

Ханойдаги ирсий таҳлил ва технологиялар маркази директори Нгуен Тхи Нганинг айтишича, 2016 йил февраль бошида унга янги туғилган эгизакларнинг биологик отасилигини текширишни истаган эркак мурожаат қилган. Эркакнинг яқинлари эгизаклардан бири отаси ва эгизига умуман ўхшамаслигини айтишган. Ирсий таҳлил эгизакларнинг онаси бир аёл эканлигини, бироқ унинг турмуш ўртоғи фақатгина эгизаклардан бирининг отаси эканлигини тасдиқлаган.

Фанда гетеропатерналь суперфекундация деб аталувчи бу ҳодиса бир неча омилларнинг бир вақтда юз беришидагина содир бўлиши мумкин. Бундай ҳолатларнинг юз бериши жуда кам учрайди. Нгуеннинг айтишича, у ўз амалиётида бундай ҳодисага бир марта дуч келган, дунёда эса бор-йўғи 10 та бундай ҳолат қайд қилинган.