Футбол уюшмалари халқаро кенгаши (ИФАБ) футбол учрашувининг қўшимча бўлимларида 4-ўйинчини захира ўйинчи билан алмаштириш қоидасини синовдан ўтказишга розилик берди, деб хабар берилмоқда ФИФА расмий сайтида. 

Бундан ташқари, кенгаш яқин икки йил ичида "уч карра жазолаш" қоидасини ўзгартиришни режалаштирмоқда. Эслатиб ўтамиз, айни вақтда ушбу қоидага кўра, рақиб ўйинчига қулай позициядан гол уришга халақит қилиш мақсадида қоидабузарликка йўл қўйган ўйинчи 11 метрлик жарима, майдондан четлатиш ва дисквалификация билан жазоланади.

"Агар дарвозабон ёки ҳимоячи ўз жарима майдонида қоидани оддий курашда бузган бўлса, энди ҳакам ўйинчига қизил эмас, фақатгина сариқ карточка кўрсатади. Бироқ кескин қоидабузарлик ёки очиқчасига қўполлик аввалгидек қизил карточка билан жазоланади. Бу ўзгаришлар жорий йилнинг 1 июнидан кучга киради ҳамда Евро-2016 ва Америка кубогида жорий қилинади", деб айтди ФИФАнинг янги президенти Жанни Инфантино.

Аввалроқ ИФАБ футболда видеотакрорлар тизимини синовдан ўтказишни маъқуллагани маълум қилинганди. Унга кўра баҳсли вазиятлар хоккейдаги каби видеони қайта кўриш орқали ҳал қилинади.