Голландиядаги тиббиёт марказларидан бирининг олимлари Хитойдан келтирилган минг йиллик Будда ҳайкалини ўрганиб чиқишди. Компьютер томографияси ёрдамида 11 ёки 12-асрга тегишли Будда ҳайкали ўз ичида будда роҳибининг мумиёланган қолдиқларини сақлаши маълум бўлди.

"Олимлар ҳайкал ичида одам қолдиқлари борлигини аввалроқ ҳам тахмин қилишган, бироқ текширув давомида яна битта кашфиёт қилинди: мумиёнинг олиб ташланган ички аъзолари ўрнида қадимий хитой иероглифларида ёзилган қоғоз бўлаклари аниқланди", деб ёзмоқда "День Online" нашри.

Ҳозирча булар қандай ёзувлар эканини аниқлашнинг имкони йўқ, чунки мумиё жуда мўрт бўлгани сабабли уларни чиқариб олишнинг иложи бўлмаяпти. Бироқ олимлар томонидан "бизнинг энг кекса мижоз" деб аталаётган мумиё ўзи ҳақида баъзи нарсаларни аён қилди.

Ҳайкалнинг асосида ётган қоғозда исм ёзилган бўлган. Аниқланишича, мумиё Хитой медитация мактабининг Лю Цюань исмли роҳиби бўлган. Шунингдек, роҳибнинг 1100 йилда вафот экани аниқланди.