5 март куни Грознийда ўтказилган ҳимоя жангида WBA камарини австралиялик рақиби Лукас Браунга ютқазиб қўйган ўзбекистонлик боксчи Руслан Чагаев ўз инстаграми орқали дўстлари ва мухлисларидан узр сўради.

"Мухлислардан ва ўз дўстларимдан узр сўрамоқчиман. Афсус, сизнинг ишончингизни оқлай олмадим. Барчаси Аллоҳнинг иродаси", деб ёзади Чагаев.

У шунингдек, ўз ҳомийси, Чеченистон республикаси раҳбари Рамзан Қодировга алоҳида мурожаат қилган.

"Мен камарни қайтариб олиш учун қўлимдан келган барча ишни қиламан", деган у.

Эслатиб ўтамиз, 5 март оқшомида Грозний шаҳридаги Спорт Холле Колизей саройида катта бокс оқшоми ўтказилди. 13та жангнинг 11тасида "Ахмат" спорт клуби вакиллари ғалаба қилишди. "Кичик Тайсон" лақабли Висхон Мирзабеков ва "Оқ Тайсон" лақабли Руслан Чагаев эса ўз жангларида мағлубиятга учрашди.

Мутахассилар 9 раунд давомида Руслан Чагаев устунлик қилганини қайд этишган. 6 раундда у рақибини полга қулатишга ҳам муваффақ бўлган. 10 раундда эса Руслан Чагаев кутилмаганда зарбани ўтказиб юборди ва нокдаунга учради. У ўрнидан кўтарилган ва жангни давом эттирнан бўлсада, Браун рақибига босим уюштирган вақтда жанг рефериси Руслан Чагаевга техник мағлубият ёзди.