Самарқанд давлат чет тиллар институтида 8-март – Хотин-қизлар байрами муносабати билан “8 март—гўзаллик ва нафосат байрами” деб номланган кеча ўтказилди.

Байрам тадбирини институт ректори Ғ.Раҳимов очиб, барча аёл-қизларни институт ректори ҳамда жамоаси номидан гўзаллик ва нафосат айёми 8 март – халқаро Хотин-қизлар куни байрами билан чин юракдан муборакбод этди ва байрам билан табриклади. Юртимиз илм-фанига муносиб ҳисса қўшган ва ҳозирда фаолият олиб бораётган олима аёлларга узоқ умр, сиҳат-саломатлик, бахт ва омад, оилавий тинчлик хотиржамлик тилади. Сўнгра барча аёл-қизларга қимматбаҳо эсдалик совгъалари ҳамда анвойи гуллар тақдим этилди.

Шундан сўнг тадбирнинг байрам қисми бошланиб, унда шўх ва мумтоз куй-қўшиқлар, қизиқарли ўйинлар, ҚВЗ терма жамоасининг ҳазил-мутойибага бой чиқишлари, Ўзбекистон давлат санъат ва маданият институтидан ташриф буюрган амалиётчи талабалар ҳамда “Бахт” гуруҳининг байрам дастурлари ҳавола этилди.

Тадбир давомида сўзга чиққанлар кеча ташкилотчиларига ўз миннатдорчиликларини билдириб, барчани байрам билан қутлашди.