Бугун, яъни 9 март куни Индонезиядаги тўлиқ қуёш тутилишини мамлакатнинг 12 провинциясида истиқомат қилувчи 40 миллиондан ортиқ одамлар, қолаверса интернетда тўғридан тўғри кўрсатиш орқали ер юзининг яна бошқа минглаб одамлари томоша қилишга муваффақ бўлдилар.

90 сониядан тўрт минутгача давом этган самовий ҳодисага сайёҳлар эътиборини жалб этиш учун маҳаллий ҳокимият томонидан Суматранинг шарқий томонидаги Банка ва Белитунг ороллари танланди, деб хабар беради ТАСС.

Худди шу ерда сирли ҳодисани кутаётган меҳмонлар кўнглини очиш учун сув ва қуруқликда ранг-баранг шоу-томошалар ташкил этилди. Қуёш тутилиши пайтида индонезиялик қабила вакиллари қуёшни тезроқ ўз ўрнига “қайтариш” учун махсус маросим рақсини ижро этишди. Маҳаллий мусулмонлар эса оммавий намоз ўқишди.

Белитунг оролига ғаройиб ҳодисани ўз кўзи билан кўриш учун шахсан Индонейзия президенти Жоко Видодо ташриф буюрди.
Жакарта марказий истироҳат боғида кўнгиллилар 4 мингдан зиёд махсус кўзойнаклар тарқатишган.

Қуёшнинг тўлиқ тутилиши 05:16 (Индонезия маҳаллий вақти билан 07:16) да Ҳинд океанининг шимоли-шарқий қисмида бошланди.