Профессионал бокснинг супероғир вазн тоифасида WBC йўналиши чемпиони камари учун ушбу камарнинг амалдаги соҳиби америкалик Деонтей Уайлдер ва даъвогар, россиялик боксчи Александр Поветкин ўртасидаги жанг Россия ҳудудида ўтказилади. Бу маълумотни “Мир бокса” промоутерлик компанияси раҳбари Андрей Рябинский ўз твиттери орқали расман тасдиқлаган.

"Менда бир қанча вариантлар бўлганди: кўпроқ пул ҳақида ўйлаш ёки Саша учун қулай шароитларни таъминлаш. Мен иккинчисини танладим ва жанг Россияда ўтказиладиган бўлди. Мен бу жангда ким ғалаба қилишини билмайман. Лекин жанг олдидан хотиржам бўлишни истадим, Саша ўзини яхши ҳис қилиши учун қўлимдан келган барча ишни қилдим. Уайдлер ва унинг жамоасини бизникида меҳмон сифатида кўришдан жуда ҳам хурсанд бўламан", деб ёзади Рябинский

Ҳозирча бу жангнинг ўтказилиш санасига аниқлик киритилмаган. Рябинский бу жангнинг шу йилнинг май ойи охирида ўтказилишини айтган.

Рябинскийнинг жамоаси промоутерлик савдоларида ушбу жангга эгалик қилиш ҳуқуқини 7 миллион долларга сотиб олганди.

30 ёшли Уайлдер шу вақтгача 36та жанг ўтказган ва барчасида ғалаба қилган (35 КО). Россиялик собиқ жаҳон чемпиони, 36 ёшли Александр Поветкин эса фақат бир марта украиналик Владимир Кличкодан енгилган (30-1, 22 КО).