Собиқ нигериялик диктатор Сани Абачининг 321 миллион доллар миқдоридаги авуарлари (фр. avoir — бойлик, мол-мулк, актив) Нигерияга қайтарилади.

Ушбу мазмундаги келишув Швейцария ташқи ишлар вазири Дидье Буркхалтернинг 8 март куни Абужага ташрифи чоғида имзоланди.

Вазир қайтариладиган пуллар, ҳужжатда кўрсатилганидек, ижтимоий дастурларни қўллаб-қувватлаш йўлида сарфланади, дея умид билдирган.

Швейцария Абачининг авуарларини унинг юртига қайтарган биринчи мамлакат: 10 йил аввал ҳам 720 миллион доллар Нигерияга қайтарилган.

2014 йилнинг октябрь ойида Женева прокуратураси Абачи оила аъзоларининг қўли остидаги турли ташкилотлардан 300 миллион доллардан ортиқ мулк мусодараси ҳақида хабар қилган. 2006 йили бу маблағлар Женева сўровига биноан Люксембургда қўлга олинган.

Пулларни Африка мамлакатига қайтаришни назарда тутувчи Нигерия ҳукумати ва Абачи оиласи ўртасида 2014 йил июль ойида тузилган келишувдан кейин авуарларни Люксембургдан Швейцарияга олиб келиш ва йўналтириш имкони туғилди.

Келишув шартларига кўра, Нигерия ҳукумати Сани Абачининг кичик ўғли Абба Абачига қарши судга даъво аризаси билан мурожаат қилишдан воз кечди.

Абба Абачи отасининг даврида пулларни ноқонуний айлантиргани учун 2010 йил Женевада шартли судланиб, унга 24 ойлик қамоқ жазоси тайинланган эди.

Сани Абачи (1943-1998) Нигерияда мудофаа вазири, кейин вице-президент вазифаларида ишлаган. 1993 йили ҳарбий тўнтариш амалга ошириб, Муваққат бошқарув кенгаши ва Федерал ижроия кенгаши раиси мансабларини эгаллаб олади. Нигериянинг ҳозирги ҳокимияти ҳисобича, Абачи бошқарув даврида 4 миллиард доллар пулни ўзлаштириб юборган.