Бразилиянинг Сан-Паулу шаҳрида яшовчи, даҳшатли автофалокатда бешикаст омон қолган аёл "ҳайратдан ёқа ушлаган" гувоҳлар кўз ўнгида пачоқланган BMW машинаси бўлаклари орасида ўзининг ташқи кўринишидан хавотирланиб, бамайлихотир ўзига оро бера бошлаган. 

Ушбу нохуш воқеа Сан-Паулу чеккасидаги Салим Фарах Малуфа кўчасида ўтган дам олиш кунлари содир бўлди. BMW 335i эгаси ўзининг дугонасига ўз машинасининг бутун "қудратини" кўрсатиб қўймоқчи бўлган, бироқ навбатдаги машинани қувиб ўтаётганда бошқарувни қўлдан чиқариб, 160 км/соат тезликда кўприкнинг устунига келиб урилган.

Зарбадан автомобилнинг чап томони тўлиқ пачоқланиб, машина сочилиб кетган, ҳайдовчи эса автомобиль ичида қисилиб қолган. Эркак олинган жароҳатлардан воқеа жойида ҳалок бўлган. Бу орада унга ҳамроҳлик қилган аёл автомобиль ўриндиғидан жилмаган ҳолда гувоҳлар кўз ўнгида ўзига макияж қила бошлаган. Аёл йўл-транспорт ҳодисасида майда жароҳат билан чекланиб қолган.