Мельдоний АҚШ аксилдопинг агентлиги (USADA) махфий манбадан Шарқий европалик спортчилар уни допинг сифатида ишлатишлари ҳақидаги маълумотни олгандан кейин Бутунжаҳон аксилдопинг агентлигининг (WADA) тақиқланган моддалари рўйхатидан жой олди, деб таъкидламоқда USA Today нашри. USADA бу маълумотни олгандан кейин бу масалани ҳар йили ўтказиладиган симпозиумда кўтарди ҳамда 2014 йил октябрида мельдоний WADA кузатув олиб борадиган дори воситалари рўйхатига киритилди. 2014 йил охирида WADA’да сақланган 8,5 мингта турли сийдик намуналари текширилди. Милдронат моддаси 2,2 фоиз спортчиларнинг намуналарида аниқланган, эътиборга молик томони, бу спортчиларнинг барчаси Шарқий европалик спортчилар бўлган.

Ушбу тадқиқот натижалари WADA’нинг 2016 йил 1 январдан мельдонийни ўз қора рўйхатига киритиш учун асос бўлган.

Ўтган бир неча кун ичида милдронат моддаси россиялик спортчилар – теннисчи Мария Шарапова, фигурали учувчи Екатерина Боброва, шорт-трек бўйича Олимпия чемпиони Семен Елистратов, конькичи Павел Кулижников, шорт-трекчи Екатерина Константинова ва волейболчи Александр Маркин намуналарида аниқланган.