Россиянинг Назран шаҳридаги Носир-Кортов масжидида ўтаётган жума ибодати вақтида масжид яқинида автомобиль портлади. Бу ҳақда Ингушетиядаги ҳуқуқни муҳофаза қилиш органларига асосланган ҳолда ТАСС ахборот агентлиги хабар тарқатган.

Дастлабки маълумотларга кўра, портловчи қурилма орқали портлаш содир этилган.

"Бу автомобилдаги газ баллони портлаши эмасди. Кучли портловчи қурилма ҳаракатга келди", дейди манба. Унинг айтишича, 5 кг тротил эквивалентидаги портлаш рўй берган.

Жабрланувчилардан бирининг айтишича, портловчи қурилма ўрнатилган ВАЗ-2107 автомобили кишилар масжидга кириб кетганидан кейин шу ҳудудга кириб келган. Жабрланувчи шахс Ингушетия республика клиникасига оғир аҳволда келтирилган.

Хабарда айтилишича, бу воқеа Москва вақти билан соат 13:40да рўй берган. Қурилма ўрнатилган автомобиль бутунлай яроқсиз ҳолга келган, портлаш атрофдаги 5 машинага таъсир кўрсатган.

Айни вақтда махсус гуруҳлар ҳодиса тафсилотларини ўрганишмоқда.