Москвада 11 мартда "Ингеоком" қурилиш-монтаж бошқармаси идораси ёнида бир неча ўнлаб одамлар, асосан меҳнат муҳожирлари тўпланишди.

Ҳуқуқ ҳимоячиси Икром Хамуралиев "Дождь" телеканали мухбирига айтишича, Москва метроси қурувчилари тегишли хавфсизлик техникасисиз ўтказилган 5 ойлик оғир ишлардан кейин ўз маошларини ололмаяптилар. 1 мартдан бери қурувчилар ишга чиқмаяптилар, қурилиш бошқармаси эса маошнинг тўланмаслигини етарлича молиялаштирилмаганлик билан тушунтирмоқда.

"Бу бизни ташвишга солиши керак, чунки одамлар ҳар куни оғир шароитларда 12 соатлаб ишламоқдалар, бу эса меҳнат қонунчилиги қоидабузарлиги ҳисобланади. Бизнинг қонуний талабларимиз шундан иборатки, биз оғир, виждонли ва москваликлар учун жуда муҳим бўлган меҳнатимиз учун маошимизни олмоқчимиз", деб айтди меҳнат муҳожирлари касаба уюшмалари марказий қўмитаси раиси Ринат Каримов.

"Ингеоком" Москвада 2001 йилдан бошлаб метро қуриш билан шуғуллана бошлаган. Компания ўзи қурган биринчи станция "Выставочная"ни 2005 йилда фойдаланишга топширган. Forbes маълумотларига кўра, 2013 йилда компаниянинг даромади деярли 40 млрд рублни ташкил қилган.