Тошкентда 19-27 апрель кунлари бўлиб ўтадиган Маркетинг ва реклама ҳафталиги – ADWEEK.UZга бағишланган матбуот анжумани ўтказилди. Бу ҳақида UzReport ахборот агентлиги хабар берди.

Қайд этилишича, ушбу тадбир доирасида реклама, маркетинг, дизайн, технология ва маиший соҳаларнинг мутахассислари илк маротаба бир майдонда йиғилиб, реклама саноати ва маркетинг коммуникациясидаги инновацион ечимларнинг хилма-хиллигини намойиш этишади. Шунингдек, улар ADBRAND 2016 – йилнинг энг яхши бренди танловида иштирок этишади. Ҳафталикда UZREPORT TV телеканали ахборот ҳамкори сифатида қатнашади.

ADWEEK.UZ дастури жуда ҳам қизиқарли бўлиши режалаштирилган. Ҳафталик доирасида мамлакатимизда ўз фаолиятини реклама соҳасига бағишлаган етакчи компанияларнинг маҳсулот ва хизматлари намойиш этилувчи ADFORUM 2016 форум-кўргазмаси ўтказилади. Кўргазмада реклама ва маркетинг агентликлари, дизайн, web ва production студиялари, матбаа корхоналаридан иборат 30 га яқин компаниялар иштирок этиши кутилмоқда.

Бундан ташқари, матбуот анжуманида ADWEEK.UZ доирасида реклама бизнесини юритиш бўйича ўз малака ва тажрибаси билан ўртоқлашувчи соҳа мутахассисларидан семинарлар, маҳорат дарслари ташкил қилинади.