Тадбиркорлик фаолиятига пул тикиб, ундан ҳар ойда мўмай даромад олишни ният қилган тошкентлик фуқаро фирибгарнинг тузоғига тушди. Бу ҳақида “Огоҳ” нашри хабар бермоқда.

Газетанинг ёзишича, у бир танишининг маслаҳатига кўра тадбиркорлик фаолияти билан шуғулланувчи шахс билан учрашади. У одам аслида фирибгар эди ва содда фуқарони бизнес фаолияти учун 44000 АҚШ доллари тикишга кўндиради. Ҳар ой топилган фойдадан улуш бериб туриши ҳақида айтиб, аврайди.

Ҳар ойда шунчаки оқиб келадиган пулларга қизиқиб, 44000 АҚШ долларини бериб юборади. Фирибгар дастлабки ойларда озгинадан пул бериб туради. Берилган пуллар 3000 АҚШ долларига етгач, ғойиб бўлади. Қидира-қидира алданганини тушуниб етган жабрланувчи ҳуқуқни муҳофаза қилиш органлари мурожаат қилишга мажбур бўлади.

Маълум бўлишича, айбланувчи яна бир фуқародан Хитойдай техника воситаларини олиб келиб бериш ваъдаси билан 8000 АҚШ долларини олган. Бироқ техника ҳам олиб келмаган, пулни ҳам қайтармаган.

Сохта тадбиркорнинг жиноий қилмишлари исботланиб, тегишли жазога тортилган.