Тошкентлик 14 ёшли Мадина машҳур “Голос. Дети” мусиқа лойиҳасининг танлов жараёнидан муваффақиятли ўтди. Танловнинг учинчи фасли Биринчи каналда 20 февраль куни бошланди.

У танловнинг “ожиз ҳолда тинглаш” шартида итальян бастакори Жакомо Пуччинининг “Жанни Скикки” операсидаги сопрана репертуари арияси – “O mio babbino caro” билан иштирок этди. Унинг қўшиғини тинглаган барча устозлар – Дима Билан, Пелагея ва Леонид Агутин уни ўз жамоаларида олиб қолишни исташди.

Мадина қарор қабул қилиш жуда ҳам қийин кечгани ва охир-оқибат Пелагея жамоасини танлаганини айтиб ўтди.

“Ожиз ҳолда тинглаш” доирасида устозлар 15 нафар ёш ижрочилар (7 ёшдан 14 ёшгача)дан иборат жамоани ташкил этишади. Мусиқали “жанг”да ҳар бир жамоа учга бўлинади, ҳар бир учликдан кейинги босқичга фақатгина бир иштирокчи чиқа олади. Ҳар бир жамоадан 5 нафар вокалчилар финалда 2 ўрин учун кураш олиб боради. Финалда эса томошабинлар жонли эфирдаги овоз бериш йўли орқали ғолибни аниқлашади.