Кот-д'Ивуардаги курорт зона ҳисобланадиган Гран-Бассам шаҳридаги меҳмонхонага қуролланган гуруҳ ҳужум уюштирди. CNN телеканали хабарига кўра, Абиджан шаҳридан 40 км шарқдаги бу шаҳарда жойлашган Etoile du Sud меҳмонхонасига номаълум шахслар қуролли босқин уюштириши натижасида камида 12 киши ҳалок бўлган.

Хабар қилинишича, меҳмонхона олдидаги соҳилбўйида 4 киши одамларга қарата ўт очган.

Маҳаллий ҳукумат вакиллари маълумотига кўра, ҳалок бўлган 12 кишидан 4 нафари европалик. Шунингдек, 5 аёл ҳамда 5 эркак ва 1 бола жароҳатланган.

Ҳодиса тафсилотлари аниқлаштирилмоқда.

Ҳозирча бу ҳужум учун жавобгарликни ҳеч қайси гуруҳ ўз зиммасига олмаган.

The Sun хабарига кўра, жангарилар меҳмонхонада бўлган америкаликлар делегациясини гаровга олишни мақсад қилишганди. The Guardian хабарига кўра, отишма давом этмоқда. Жангарилар сайёҳларни гаровга олишган.

Шу йилнинг январида Буркино-Фасо пойтахти Уагадугудаги Splendid меҳмонхонасига жангарилар ҳужум уюштирган ва АҚШ, Украина, Канада, Нидерландия, Швейцария ва Франция фуқаролари бўлган 27 кишини ўлдиришганди. Бу ҳужум "Ал-Қоида" таъсиридаги гуруҳ томонидан содир этилган.

Ўтган йилнинг 20 ноябрида Мали пойтахти Бамако шаҳридаги Radisson Blu меҳмонхонасига ҳужум уюштирилганди. Ўшанда қурбонлар сони 20 нафарни ташкил қилган.