Фарғона вилоятининг Тошлоқ туманида яшовчи фуқарога тегишли «Nexia» русумли автомашина номаълум шахс томонидан ўғирлаб кетилган.

Фарғона вилоятининг Тошлоқ тумани ИИБга Ёзёвон тумани Тафаккур кўчасида яшовчи фуқаро ариза билан мурожаат этиб, унинг А.Навоий кўчасида жойлашган автомашина эҳтиёт қисмлари дўкони олдида қаровсиз қолдирилган «Nexia» русумли автомашинасини номаълум шахс ҳайдаб олиб қочиб кетганлигини маълум қилган.

Олиб борилган тезкор-қидирув тадбирлари натижасида автомобильни шу туманнинг Дўстлик кўчасида истиқомат қилувчи 1974 йилда туғилган фуқаро маст ҳолда ҳайдаб кетиб, йўлда бошқарувни эплай олмай "Дамас" русумли автомашина билан тўқнашув содир этгани аниқланган ва ушланган.

ИИВ ахборот хизматининг хабарига кўра, мазкур ҳолат юзасидан дастлабки терговолди ҳаракатлари олиб борилмоқда.