Қозоғистон собиқ бош вазири Серик Ахметовга нисбатан чиқарилган 10 йиллик жазо муддати, 8 йилга қисқартирилди. Бу ҳақда “Новости-Казахстан” агентлиги хабар бермоқда.

Мазкур қарор Қарағанда вилояти судининг апелляция кенгаши томонидан қабул қилинган.

“Ахметов томонидан 2 млрд 254 млн 707 танга (6,5 млн доллар) миқдорида келтирилган зарар қоплангандан сўнг, кенгаш унга чиқарилган ҳукмни юмшатиш керак деб топди”, — деди кенгаш раиси Рашид Нурмагамбетов.

Сиёсатчининг адвокати маълум қилишича, Ахметов ўз қилмишига иқрор бўлган.

Маълумот учун, Қозоғистоннинг собиқ бош вазири Серик Ахметов коррупцияда айбланиб, 2015 йилнинг декабрь ойида қўлга олинган эди. У ҳукуматни 2012 йилнинг сентябрь ойидан 2014 йилнинг апрель ойига қадар бошқарганди.